Universitetimizning ilk bitiruvchilariga tantanali ravishda diplomlar topshirildi

Bugun, 1-noyabr kuni Qashqadaryo viloyati musiqali drama teatrida universitetimizning ilk bitiruvchilari uchun unutilmas sana Osiyo texnologiyalar universitetining birinchi bitiruvchilariga diplom topshirish marosimi hamda konsert dasturi bo'lib o'tdi.

Unda universitet rahbariyati, professor-o‘qituvchilar, bitiruvchilar va talaba-yoshlar ishtirok etdi. Tadbirda Osiyo texnologiyalar universiteti rektori L.Raxmonov, Qashqadaryo viloyati Maktabgacha va maktab ta’limi boshqarmasi boshlig‘i o'rinbosari D.Tojiyev, Oliy ta’lim, fan va innovatsiyalar vazirligi Qashqadaryo viloyati hududiy boshqarmasi boshlig‘i O.Movlanov, Qarshi davlat universiteti Maktabgacha ta’lim kafedrasi mudiri, professor N.Oripovalar so‘zga chiqib, o‘z nutqlarida bitiruvchilarni ushbu qutlug' kun bilan tabriklab, ularga kelajakdagi faoliyatlarida muvaffaqiyat va zafarlar tilashdi.

Tadbir davomida o‘zbek milliy qo‘shiqlari va raqslaridan iborat konsert dasturi namoyish etildi. Mashhur estrada yulduzlari va san’atkorlar tomonidan ijro etilgan kuy-qo‘shiqlar va sahna ko‘rinishlari bayramga alohida shukuh bag‘ishladi.

Yakunda bitiruvchilar uchun maxsus tayyorlangan "Talabalik oltin davrim" mavzusidagi esdalik videoroligi namoyish etildi. Unda talabalar universitet davrini eslatuvchi iliq lahzalarga guvoh bo‘lishdi. Tadbir so‘ngida bitiruvchilarga tantanali ravishda diplom va esdalik sovg‘alari topshirildi.